ഒട്ടു മാവ്..

      ചെറിയ ആ വീടിന്റെ മുറ്റത്ത്‌ തന്നെ വളര്‍ന്നു പന്തലിച്ചു നില്‍ക്കുന്നു ആ മാവ്..കുട്ടുവിന്റെ അച്ഛന്‍ തന്റെ ചെറുപ്പത്തില്‍ നട്ടു വളര്‍ത്തിയെടുത്ത ഒട്ടുമാവ്.. മാമ്പഴ കാലത്ത് തേനൂറും മാമ്പഴം അതില്‍ നിറഞ്ഞു നിന്നു.. കുട്ടുവിന്റെ അമ്മയുടെ പരാതി എപ്പോഴും കേള്‍ക്കാറുണ്ട്, "ചോറും വേണ്ട കഞ്ഞിയും വേണ്ട, ഏതു നേരവും മാമ്പഴം തിന്നു നടക്കല്‍ തന്നെ.." കുട്ടുവിനു അത്രയ്ക്ക് ഇഷ്ട്ടമായിരുന്നു ആ മാമ്പഴം.. അവന്‍ അത് തന്റെ സുഹൃതുക്കള്‍ക്കൊക്കെ കൊണ്ട് കൊടുക്കും, അതിന്റെ മധുരത്തെ കുറിച്ച് കൂട്ടുകാര്‍ പറയുന്നത് കേട്ട് അവന്‍ ആത്മാഭിമാനം കൊണ്ടു.. 

    വര്‍ഷങ്ങള്‍ കഴിഞ്ഞു കുട്ടു വലുതായി, കാലം മാറി... കല്യാണമൊക്കെ കഴിഞ്ഞു കുട്ടികളൊക്കെ ആയി സുഖമായി ജീവിച്ചു കൊണ്ടിരിക്കെ ചെറിയ ആ വീട് മാറ്റി പണിയാം എന്ന ചിന്തയിലായി അയാള്‍...,. ഒടുവില്‍ വീട് പൊളിച്ചു, പകരം ഒരു മണി മാളിക ഉയര്‍ന്നു അവിടെ.. വലിയ വീടിന്റെ ഭംഗി കൂട്ടാന്‍ നല്ല ഒരു മതില് വേണമല്ലോ... പക്ഷെ മുറ്റത്ത്‌ തന്നെയുള്ള ആ മാവ് മുറിക്കാതെ മതില്‍ കെട്ടാന്‍ ആവില്ല.. അയാള്‍ മതിലു വേണ്ട എന്ന് പറഞ്ഞു.. പക്ഷെ ഭാര്യ വിട്ടില്ല, "ഒരു മാവും പറഞ്ഞു വീടിന്റെ ഭംഗി കുറയ്ക്കാനോ..? രാവിലെ ആ മാവില്‍ നിന്നും ആദ്യത്തെ വീടിന്റെ മുറ്റത്ത്‌ വീഴുന്ന ഇലകള്‍ അടിച്ചു വാരി എന്റെ നടുവൊടിഞ്ഞു.. അത് വെട്ടാതെ ഞാന്‍ ഈ പുതിയ വീട്ടിലേക്കു കേറുന്ന പ്രശ്നമില്ല.." അവസാനം തന്റെ കുട്ടിക്കാലം ഒക്കെ മറന്നു തേനൂറും മാമ്പഴം നല്‍കിയിരുന്ന ആ മാവിന്റെ കഴുത്തില്‍ കോടാലി വെക്കാന്‍ അയാള്‍ തന്നെ ആളെ വിളിച്ചു കൊണ്ട് വന്നു... 
   താന്‍ ഈ ലോകത്ത് നിന്നും എന്നെന്നേക്കുമായി പോവുകയാണ് എന്ന് അറിഞ്ഞ മാവ് ഒരുപാട് കരഞ്ഞു..പക്ഷെ അയാള്‍ അത് കണ്ടില്ല.. ഇത്രയും കാലം നിനക്ക് ഇഷ്ട്ടമുള്ളത്ര മാമ്പഴം തന്ന എന്നെ നശിപ്പിക്കാന്‍ പോകുന്ന നീ ഇതിനു പകരം അനുഭവിച്ചിട്ടെ ഈ ലോകത്ത് നിന്നും പോവൂ എന്ന ശാപത്തോടെ മാവ് നിലം പതിച്ചു..ഭാര്യയുടെ സ്വപ്നത്തിലെ പോലെ ഭംഗിയുള്ള മതിലും കെട്ടി അയാളും കുടുംബവും പുതിയ വീട്ടിലേക്കു ചേക്കേറി..  

    വര്‍ഷങ്ങള്‍ വീണ്ടും പൊഴിഞ്ഞു വീണു, അയാള്‍ക്ക്  വയസ്സായി.. മക്കളൊക്കെ പഠിച്ചു വലുതായി പല ഭാഗങ്ങളിലായി പല രാജ്യങ്ങളിലായി ചിതറി.. പ്രായത്തിന്റെ അസുഖങ്ങള്‍ ബാധിച്ചു തുടങ്ങിയപ്പോ ഒറ്റയ്ക്ക് എണീറ്റ്‌ നടക്കാനൊക്കെ ഭയങ്കര പ്രയാസം.. മക്കളെ ഓരോരുത്തരെ ആയി വീട്ടില്‍ മാറി മാറി നില്‍പ്പിച്ചു.. പക്ഷെ ചുമയും മറ്റുമൊക്കെ മക്കളുടെ ഭാര്യമാര്‍ക്ക് ഇഷ്ട്ടപ്പെടാതായി തുടങ്ങി.. ഭാര്യമാര്‍ അവരവരുടെ ഭര്‍ത്താക്കന്മാരുടെ ചെവിയില്‍ മൂളാന്‍ തുടങ്ങി.. എന്തിനു ഇതിനെ ഇങ്ങനെ താങ്ങണം, എവിടേലും കൊണ്ട് വിട്ടാ പോരെ.. മൂളല്‍ കൂടി കൂടി ചെവിക്കു സമാധാനം ഇല്ലാതായപ്പോ മക്കളും മാറി ചിന്തിച്ചു തുടങ്ങി.. ആര്‍ക്കും ഉപകാരമില്ലാത്ത ഇതിനെ വല്ല ആതുരാലയത്തിലും കൊണ്ടിട്ടാല്‍ സമാധാനത്തോടെ ജീവിക്കാലോ..

   അങ്ങനെ ഒരു ദിവസം ആശുപത്രിയിലേക്ക് എന്നും പറഞ്ഞു മക്കള്‍ അയാളെ കുളിപ്പിച്ചൊരുക്കി എടുത്തു പുറത്തേക്കു കൊണ്ട് പോയി.. നേരെ പോയത് ഒരു വൃദ്ധ സദനത്തിലേക്ക്.. ഇത്രയും കാലം വളര്‍ത്തി വലുതാക്കിയ, ഇനിയൊരു ഉപകാരത്തിനും എത്താത്ത അച്ഛനെ ആ സദനത്തില്‍ ആക്കി മക്കള്‍ തിരിച്ചു, അവരുടെ സ്വാര്‍ഥത കൊണ്ട് സമാധാനപരം എന്ന് തോന്നുന്ന ജീവിതത്തിലേക്ക്..

  താന്‍ മക്കളില്‍ നിന്നും ഒറ്റപ്പെട്ടിരിക്കുന്നു, മക്കള്‍ക്ക്‌ എന്നെ വേണ്ടാതായിരിക്കുന്നു എന്ന് തിരിച്ചറിയാന്‍ അയാള്‍ക്ക് അധിക സമയം വേണ്ടി വന്നില്ല.. പൊട്ടി പൊട്ടി കരഞ്ഞു തളര്‍ന്നു വീണു അയാള്‍, ആ കരച്ചില്‍ കേള്‍ക്കാന്‍ വര്‍ഷങ്ങള്‍ക്കു മുമ്പ് മുറിച്ചു മാറ്റിയ ആ തേനൂറും മാവിന്റെ ആത്മാവ് അവിടെ എവിടെയോ ഉണ്ടായിരുന്നുവോ..??!!! 

കൊച്ചി മെട്രോ എന്ന ചക്കരക്കുടം....

എന്ത് എഴുതണം എങ്ങനെ എഴുതണം എന്ന് ഒരു എത്തും പിടിയും കിട്ടുന്നില്ല..കാരണം അത്രയ്ക്ക് വെറുക്കുന്നു ഈ കൂട്ടരെ...കേരളത്തിന്റെ അഭിമാനമായി മാറേണ്ട കൊച്ചി മെട്രോയെ ഇല്ലാത്ത ഓരോ കാരണം പറഞ്ഞു നീട്ടി നീട്ടി കൊണ്ട് പോകുന്ന ഉദ്യോഗസ്ഥ-രാഷ്ട്രീയ കള്ളന്മാരെ... ഇവരെ പറ്റി മനസ്സില്‍ ഉള്ളത് പറഞ്ഞാല്‍ ഈ പരിസരം വൃത്തി കേടാവും എന്നത് കൊണ്ട് അതൊക്കെ ഞാന്‍ മനസ്സില്‍ തന്നെ വെക്കുന്നു..  ഇത് ഇങ്ങനെ ഒക്കെ ആവാന്‍ അല്ലെങ്കില്‍ എന്തൊക്കെയോ ആക്കി തീര്‍ക്കാന്‍ നടക്കുന്ന ഈ കൂട്ടര്‍ക്ക് ഒരേ ഒരു ലക്ഷ്യമേ ഉള്ളു, നമ്മുടെ പണം അവരുടെ പോക്കെറ്റില്‍ എത്തിക്കുക എന്നാ ഒരൊറ്റ ലക്‌ഷ്യം.. കാരണം അയ്യായിരം കോടിയുടെ മുകളില്‍ ചെലവ് വരുന്ന ഈ പദ്ധതി സ്വന്തം പോക്കെറ്റ്‌ നിറക്കാന്‍ കയ്യിട്ടു വാരാനുള്ള ചക്കര കുടമാണെന്ന് ഇവിടുത്തെ പ്രധാനപ്പെട്ട കള്ളന്മാരെല്ലാം മനസ്സിലാക്കിയിരിക്കുന്നു.. അതിനു രാഷ്ട്രീയത്തിന്റെയോ ഉദ്യോഗത്തിന്റെയോ അതിര്‍ വരമ്പുകള്‍ ഇല്ല... ഈ കാര്യത്തില്‍ എല്ലാവര്ക്കും ഒരേ മനസ്സ്... 

സ്വന്തം നാടിന്റെ വികസനത്തിന്‌ മുതല്‍ കൂട്ടാവും എന്ന് ഉറപ്പുള്ളത് കൊണ്ട് ഇത്രയേറെ പ്രശ്നങ്ങളും പ്രതിസന്ധികളും ഉണ്ടായിട്ടും ഇത് നടത്താന്‍ എന്‍റെ ശ്രമം തുടരും എന്നും പറഞ്ഞു പന്ത്രണ്ടു വര്‍ഷത്തോളമായി നടക്കുന്ന ടി ശ്രീധരനെ പോലെ ആത്മാര്‍ഥതയുള്ള ഏതെങ്കിലും ഉദ്യോഗസ്ഥനോ ഒരു രാഷ്ട്രീയക്കാരനോ  ഇവിടെ ഉണ്ടായിരുന്നെങ്കില്‍ ഈ സ്വപ്നം ഇപ്പൊ പാതി വഴിയില്‍ എത്തിയിട്ടുണ്ടാവുമായിരുന്നു.. എത്രയും പെട്ടെന്ന് തുടങ്ങിയാല്‍ ഉണ്ടാവുന്ന ലാഭം ഇവിടുത്തെ കള്ളന്മാരുടെ കണക്കിലേ ഇല്ല, കാരണം അവര്‍ക്ക് ജനങ്ങളുടെ പണം എത്ര പോയാലും പ്രശ്നമില്ല, സ്വന്തം കീശയിലെക്കുള്ളത് മുടങ്ങരുത് എന്നാ ഒരൊറ്റ ലക്‌ഷ്യം മാത്രമേ ഉള്ളു.. ഇത്രയൊക്കെ പച്ചക്ക് നമ്മുടെ കണ്മുന്നില്‍ നടന്നിട്ടും ഇവരെ ഇവിടുന്നു അടിച്ചു ഓടിക്കാന്‍,അവരോട് മുഖത്ത് നോക്കി നിങ്ങള്‍ ഈ നാടിന്‍റെ ശാപമാണ് എന്ന് പറയാന്‍ നമുക്ക് കഴിയുന്നില്ലല്ലോ.. ഇലക്ഷന്‍ സമയത്ത് വലിയ വായില്‍ ചിരി കുത്തി നിറച്ചു നമ്മുടെ അടുത്ത് വന്നു വോട്ടും വാങ്ങി പോയി ചില്ല് കൊട്ടാരത്തില്‍ കേറി ഇരുന്നു നമ്മെ കഴുതകളാക്കുന്ന ഈ കൂട്ടരെ നമ്മള്‍ ഇനിയും മനസ്സിലാക്കാന്‍ കഴിയുന്നില്ലല്ലോ.. നിങ്ങളോട് ഞങ്ങള്‍ക്ക് ഒന്നേ പറയാനുള്ളൂ, ഭാരതത്തിന്റെ അഭിമാനം കാക്കാന്‍ വേണ്ടിയാണ് ഞങ്ങള്‍ ഇലക്ഷനില്‍ പങ്കെടുക്കാന്‍ നിര്‍ബന്ധിതരാവുന്നത്.. ഒരു പക്ഷെ നിങ്ങള്‍ ഇനിയും ഇത് പോലെ തുടരുകയാണെങ്കില്‍ ജനങ്ങള്‍ നിങ്ങളെ മട്ടുപ്പാവില്‍ നിന്നും വലിച്ചിറക്കി അടിച്ചോടിക്കുന്ന ഒരു കാലം വരും...

ഇവിടെ ചില ഉദ്യോഗസ്ഥന്മാരും രാഷ്ട്രീയ കള്ളന്മാരെ കണ്ണടച്ച് വിശ്വസിക്കുന്ന, അവര്‍ക്ക് വേണ്ടി വാദിക്കുന്ന ആളുകളുടെ ചോദ്യം ഉണ്ട്, എന്ത് കൊണ്ട് ഇതിനു ആഗോള ടെണ്ടര്‍  വിളിച്ചു കൂടാ എന്ന്.. ഇവിടെ ടെണ്ടര്‍ വിളിച്ചു അതിന്റെ നടപടികളുമായി മുന്നോട്ടു പോവുകയാണെങ്കില്‍ പ്രവര്‍ത്തി തുടങ്ങാന്‍ ചുരുങ്ങിയത് 5-6 വര്ഷം എടുക്കും എന്നത് ഇത്രയും കാലത്തെ നിങ്ങളുടെ കളികള്‍ കണ്ട ഏതൊരാള്‍ക്കും മനസ്സിലാക്കാന്‍ പറ്റുന്നതെ ഉള്ളു.. അത് വഴി കമ്മീഷന്‍ കൈക്കലാക്കുക എന്നാ ലക്‌ഷ്യം മാത്രമേ ഉള്ളു എന്നതും ഉറപ്പാണ്, അല്ലെങ്കില്‍ ഓരോ ദിവസം വൈകുന്തോറും നാല്പതു ലക്ഷം രൂപയ്ക്കു മുകളില്‍ നഷ്ടം വന്നു കൊണ്ടിരിക്കുന്ന ഈ പദ്ധതിയെ, ഈ പദ്ധതി വിജയകരമായി പൂര്‍ത്തിയാക്കാനുള്ള ആളുകളും യന്ത്ര സാമഗ്രികളും ഉള്ള,ഇത് വരെ ഏറ്റെടുത്ത പദ്ധതികളെല്ലാം തന്നെ നിശ്ചിത സമയത്തിന് മുന്നേ തീര്‍ത്തു ലാഭം നേടിക്കൊടുത്ത ഒരു പൊതുമേഖല സ്ഥാപനത്തെ ഏല്‍പ്പിക്കാന്‍ നിങ്ങള്‍ എന്തിനു ഭയപ്പെടുന്നു..?? കാരണം ഒന്നേ ഉള്ളു, അതിന്റെ തലപ്പത്ത്‌ ഉള്ളത് ടി ശ്രീധരന്‍ എന്ന കളങ്കമില്ലാത്ത അഴിമതിക്കെതിരെ സ്വന്തം പ്രവര്‍ത്തികള്‍ കൊണ്ട് മാതൃകയായ വലിയ മനുഷ്യന്‍..!! അതെ, അയാളുടെ കയ്യില്‍ ഈ പദ്ധതി എത്തിയാല്‍ നിങ്ങളുടെ പോക്കറ്റിലേക്കു ഒന്നും വരില്ല എന്ന് നിങ്ങള്‍ ഭയപ്പെടുന്നു..

ടി ശ്രീധരനെ ഞാന്‍ എന്തിനു ഇങ്ങനെ വലിയ ആളായി കാണുന്നു എന്ന് ആര്‍ക്കെങ്കിലും സംശയം ഉണ്ടെങ്കില്‍ എനിക്ക് അവരോടു ഒരു കാര്യമേ പറയാനുള്ളൂ, ഒന്ന് ഡല്‍ഹിയില്‍ പോയി മെട്രോയില്‍ കയറുക.. നിങ്ങളുടെ സംശയങ്ങള്‍ക്കുള്ള മറുപടി നിങ്ങള്ക്ക് തന്നെ ലഭിക്കും.. തിരക്കേറിയ ഡല്‍ഹിയുടെ മാര്‍ക്കറ്റുകളിലൂടെയും മറ്റും ഒരു ബില്‍ഡിംഗ്‌ പോലും ഇതിനു വേണ്ടി പൊളിക്കാതെ നടപ്പില്‍ വരുത്തിയ ഡല്‍ഹി മെട്രോ ഇന്ത്യയില്‍ തന്നെയാണോ എന്ന് നിങ്ങളെ കൊണ്ട് ചിന്തിപ്പിക്കും..അത് വാക്കുകള്‍ കൊണ്ട് പറഞ്ഞാല്‍ മനസ്സിലാക്കി തരാന്‍ ബുദ്ധിമുട്ടാണ്, അത് നേരിട്ട് അനുഭവിച്ചവര്‍ക്കു മനസ്സിലാകും... കൂടെ യാത്ര ചെയ്യുന്ന ഏതെങ്കിലും ഡല്‍ഹിക്കാരനോട് ചോദിക്കുക, ടി ശ്രീധരനെ പറ്റി, അവര്‍ പറഞ്ഞു തുടങ്ങിയാല്‍ പിന്നെ നിര്‍ത്തുമെന്ന് തോന്നുന്നില്ല..അത്രയ്ക്കുണ്ട് അവരുടെ മനസ്സില്‍ ശ്രീധരന് സ്ഥാനം..അവരുടെ യാത്ര ക്ലേശങ്ങള്‍ മാറ്റി കൊടുത്ത അദ്ദേഹത്തോടുള്ള സ്നേഹം അവരുടെ വാക്കുകളില്‍ നമുക്ക് കാണാന്‍ പറ്റും.. അവിടെ ശ്രീധരനെ അറിയാത്ത കുട്ടികള്‍ ഉണ്ടാവുമോ എന്ന് സംശയമാണ്... ഇത് ജനങ്ങളുടെ നേരിട്ടുള്ള അഭിപ്രായങ്ങള്‍..ഇനി ഔദ്യോഗികമായ പ്രശംസകള്‍ അറിയണമെങ്കില്‍ പട്ടേല്‍ ചൌക്ക് മെട്രോ സ്റ്റേഷനില്‍ ഒന്ന് ഇറങ്ങി അവിടെ സജ്ജീകരിച്ചിട്ടുള്ള മ്യുസിയത്തില്‍ ഒന്ന് കണ്ണോടിക്കുക, ഒരു ഭാഗത്ത്‌ സജ്ജീകരിച്ച ഫോട്ടോകളില്‍ നിങ്ങള്ക്ക് കാണാം ടി ശ്രീധരന്‍ എന്ന മലയാളി അവിടെ ഉണ്ടാക്കിയ പേരും പ്രശസ്തിയും..മലയാളി എന്ന നിലയില്‍ അഭിമാനം തോന്നിപ്പോകും..

                                    മെട്രോ മ്യുസിയം- പട്ടേല്‍ ചൌക്ക് മെട്രോ സ്റ്റേഷന്‍.  

അങ്ങനെ എല്ലാ വിധത്തിലും തന്‍റെ പ്രവര്ത്തികളിലൂടെ നമ്മുടെ കൊച്ചു കേരളത്തിന്റെ യശസ്സ് ഉയര്‍ത്തിയ ആ വലിയ മനുഷ്യന്‍ നമ്മുടെ കേരളത്തിലും ഇത് പോലെ ഒന്ന് വേണമെന്ന് പറഞ്ഞു മുന്നോട്ടു വന്നപ്പോള്‍ അതില്‍ നിന്നും പണം കട്ടെടുക്കാന്‍ നെറികെട്ട പ്രവര്‍ത്തികള്‍ കാണിക്കുന്ന ഇവിടുത്തെ രാഷ്ട്രീയ-ഉദ്യോഗസ്ഥ കൊള്ളക്കാരെ, നിങ്ങളുടെ മുഖത്ത് ഇവിടുത്തെ ജനങ്ങള്‍ കാര്‍ക്കിച്ചു തുപ്പുന്ന കാലം വിദൂരത്തല്ല... 

ഫേസ് ബുക്കില്‍ നിന്നും കിട്ടിയ ഒരു താരതമ്യത്തിന്റെ ചിത്രം ഇതിനോട് ചേര്‍ക്കുന്നു.. അത് ഉണ്ടാക്കിയ ആളോട് കടപ്പാട്.. 

സ്നേഹ പാത്രം...

അവന്‍ അവന്‍റെ സ്നേഹം ഒരു പാത്രത്തില്‍ നിറച്ചു കൊണ്ടേ ഇരുന്നു... പുറം ഭാഗം പരു പരുത്ത ഒരു പാത്രം, കാരണം പാത്രത്തിന്റെ ഭംഗി കണ്ടു മറ്റുള്ളവര്‍ അത് തട്ടിപറിച്ചാലോ എന്ന് അവന്‍ ഭയപ്പെട്ടു...പാത്രത്തിന്റെ ഭംഗി നോക്കാതെ അകത്തു കിടക്കുന്ന സ്നേഹം മനസ്സിലാക്കുന്ന ആള്‍ക്ക് കൊടുക്കാന്‍ അത് അവന്‍ നിറച്ചു കൊണ്ടേ ഇരുന്നു.. അവസാനം ഒരു നാള്‍ അവള്‍ക്കു മുന്നില്‍ അവന്‍ ആ പാത്രം നീട്ടിയപ്പോ പുറത്തെ പരു പരുത്ത രൂപം കണ്ടു അവള്‍ അത് തട്ടിമാറ്റി, അത് നിലത്തു വീണു പൊട്ടി... അവന്‍ ഇത്രയും കാലം സൂക്ഷിച്ചു വെച്ച സ്നേഹം ആ തറയിലൂടെ ഒഴുകിയത് അവള്‍ കണ്ടുവോ ആവോ...???

ഒരു കള്ള് ഒരു ജാതി ഒരു ഷാപ്പ്‌ മനുഷ്യന്...!!!

അങ്ങനെ കള്ളിനും ജാതി ആയി..!!! എന്തൊക്കെ കാണണം എന്‍റെ ദൈവമേ.. കഴിഞ്ഞ ദിവസം ബഹുമാനപ്പെട്ട കേരള ഹൈക്കൊടതിയുടെ കള്ള് നിരോധനം സര്‍ക്കാര്‍ അടുത്ത സാമ്പത്തിക വര്‍ഷമെങ്കിലും പരിഗണിക്കണം എന്നാ പരാമര്‍ശം കണ്ടപ്പോ ഞാന്‍ ഒരുപാട് ആഹ്ലാദിച്ചു.. നമ്മുടെ നീതി പീഠം ജനങ്ങളുടെ നന്മക്ക് വേണ്ടിയുള്ള ഇടപെടല്‍ നടത്തിയത് കണ്ടപ്പോ നീതിപീടതോടുള്ള ബഹുമാനം ഇരട്ടിച്ചു... കള്ള് നിരോധിക്കുമ്പോ ജോലി നഷ്ട്ടമാവുന്ന നാലപ്പതിനായിരത്തോളം തൊഴിലാളികളെ മറ്റു തൊഴില്‍ മേഖലകളിലേക്ക് പുനരധിവസിപ്പിക്കാനുള്ള ശ്രമവും സര്‍ക്കാര്‍ തന്നെ നടത്തണം എന്നതും കൂടി ചേര്‍ത്ത് വായിക്കുമ്പോ ലക്ഷക്കണക്കിന്‌ കുടുംബങ്ങളുടെ കണ്ണ് നീരിനു കാരണമായി മാറിക്കൊണ്ടിരിക്കുന്ന കള്ള് എന്നാ ദുരന്തത്തെ നാട്ടില്‍ നിന്ന് തുടച്ചു നീക്കുക എന്നാ നല്ല ഉദ്ദേശം സര്‍ക്കാര്‍ ഗൌരവമായി എടുക്കുമെന്ന് ഞാന്‍ പ്രതീക്ഷിച്ചു പോയി, കാരണം മദ്യ നിരോധനം തിരഞ്ഞെടുപ്പ് പത്രികയില്‍ ഉള്‍പ്പെടുത്തിയ പാര്ട്ടിയാനല്ലോ കേരളം ഭരിക്കുന്നത്.. 

അടുത്ത ദിവസം ചേര്‍ന്ന ലീഗ് യോഗത്തില്‍ ഹൈക്കൊടതിയുടെ പരാമര്‍ശം ചര്ച്ചയാവുകയും കള്ള് നിരോധനം വേണമെന്ന് സര്‍ക്കാരിനോട് ആവശ്യപ്പെടാനും പ്രബല ഭരണ കക്ഷി എന്നാ നിലക്ക് തീരുമാനമെടുത്തു, ആ തീരുമാനം പത്ര സമ്മേളനം വഴി പുറം ലോകത്തെത്തുകയും  ചെയ്തു.. ഈ പ്രസ്താവന വന്നതോടെ രംഗം മൊത്തം മാറി... കള്ള് നിരോധിക്കണം എന്ന് പറയാന്‍ ലീഗ് ആരാ, അത് ഒരു പ്രത്യേക ജാതിക്കെതിരെയുള്ള ആക്രമണമാണ് എന്നും പറഞ്ഞു, 'മദ്യം വിഷമാണ്, അത് ചെതരുത്, വില്‍ക്കരുത്' എന്ന് പഠിപ്പിച്ച ശ്രീ നാരായണ ഗുരുവിന്റെ നാമത്തില്‍ പ്രവര്‍ത്തിക്കുന്ന സംഘടനയുടെ നേതാവ് തന്നെ മുന്നിട്ടിറങ്ങിയത് കണ്ടപ്പോ ഞെട്ടിത്തരിച്ചു പോയി..ചെത്ത്‌ നിര്‍ത്തിയാല്‍ ഞാന്‍ ഇനി എന്ത് ചെയ്യും എന്ന് ചോദിച്ച ആളോട് ചെത്ത്‌ കത്തി നാലായി പകുത്തു ക്ഷുരക പണി എടുത്തു ജീവിക്ക് എന്ന് പറഞ്ഞ ഗുരുവിന്റെ പിന്‍ഗാമിയാണ്‌ ഈ പറഞ്ഞത് എന്നതും കൂടി ചേര്‍ത്ത് വായിക്കുമ്പോ ശെരിക്കും സങ്കടകരമായ വാര്‍ത്ത ആയിപ്പോയി അത്.. ലീഗ് പറഞ്ഞത് അവിടെ നില്‍ക്കട്ടെ, ബഹുമാനപ്പെട്ട കേരള ഹൈ ക്കൊടതിയുടെ നിരീക്ഷനമെങ്കിലും കണക്കിലെടുത്ത് കൊണ്ട് കള്ള് നിരോധനം സര്‍ക്കാര്‍ ആലോചിക്കണം എന്ന് ആ സംഘടന പറയുമെന്ന് ഞാന്‍ പ്രതീക്ഷിച്ചു പോയി.. 

എനിക്ക് മനസ്സിലാവാത്ത കാര്യം കള്ള് നിരോധിക്കണം എന്ന് പറയുമ്പോ അതെങ്ങനെ ഒരു ജാതിക്കെതിരെ ഉള്ള ആക്രമണം ആവും..?? തങ്ങളുടെ ജാതിയെ മുഴുവനായും കള്ള് കുടിയന്മാരായും കള്ള് വില്പ്പനക്കാരായും മറ്റുള്ളവരുടെ മുന്നില്‍ തെറ്റിദ്ധരിപ്പിച്ച ആ നേതാവിന് നേരെ ആരും അവിടെ നിന്ന് എതിര്‍ സ്വരം ഉയര്‍ത്തിയില്ല എന്നതും സങ്കടകരം തന്നെ.. 

നിരോധനത്തെ എതിര്‍ക്കുന്നവര്‍ പ്രധാനമായും പറയുന്ന ഒരു പ്രശ്നം നാല്പ്പതിനായിരത്തോളം പേരുടെ തൊഴില്‍ നഷ്ട്ടപെടും എന്നതാണ്.. കേരളത്തില്‍ ഇന്ന് പതിനാലു ലക്ഷത്തോളം അന്യ സംസ്ഥാന തൊഴിലാളികള്‍ ഉണ്ട് എന്നാണു ഞാന്‍ വായിച്ചിട്ടുള്ളത്, അങ്ങനെയാണെങ്കില്‍ ഇവിടെ ഈ നാല്‍പ്പതിനായിരം ആളുകള്‍ക്ക് നല്ല അന്തസ്സുള്ള പാവങ്ങളുടെ കണ്ണ് നീരില്ലാത്ത ജോലി ചെയ്തു സമ്പാതിച്ചു ജീവിക്കാനുള്ള അവസരം ഉണ്ടാവില്ലേ..?? അത് പോലെ തന്നെ കള്ള് കുടിച്ചു പണവും സ്വബോധവും നശിപ്പിക്കുന്നത് കൊണ്ട് കേരളത്തില്‍ എത്ര ലക്ഷക്കണക്കിന്‌ വീടുകളില്‍ സ്ത്രീകളും കുട്ടികളും ഉള്‍പ്പെടെ കഷ്ട്ടത അനുഭവിക്കുന്നു, എത്ര പേര് പട്ടിണി കിടക്കുന്നു എന്നത് ഒരു നേരമെങ്കിലും ഈ ആളുകള്‍ ആലോചിച്ചോ..? എത്ര കള്ള് ചെത്ത്‌ തൊഴിലാളികള്‍ ചെത്ത്‌ കൊണ്ട് ജീവിതം പച്ച(ലീഗിന്‍റെ പച്ച ല്ല ട്ടോ..!!) പിടിപ്പിച്ചു..? അതെ സമയം അബ്കാരി മുതലാളിമാരു അവരെ മുതലെടുത്ത്‌, പാവങ്ങളെ കൊണ്ട് കള്ള് കുടിപ്പിച്ചു കോടിപതികളായി..   ഇല്ല, അവര്‍ക്ക് കഷ്ട്ടത അനുഭവിക്കുന്ന ആളുകളോടുള്ള പ്രതിബദ്ധത അല്ല ലക്‌ഷ്യം മറിച്ചു കള്ള് വ്യവസായത്തിലൂടെ നേടുന്ന കോടികളാണ് എന്നത് ഈ ഒരു മലക്കം മറിച്ചിലില്‍ നിന്നും മനസ്സിലാക്കാന്‍ പറ്റും..

രോഗി ഇച്ചിച്ചതും ഡോക്ടര്‍ കല്‍പ്പിച്ചതും പാല് എന്ന് പറഞ്ഞ പോലെ ഹൈക്കോടതിയുടെ പരാമര്‍ശം വന്ന ഉടനെ ലീഗിന്റെ പ്രസ്താവന കൂടി വന്നത് പുറമേ കാണുന്നത് പോലെ അതിന്റെ അകത്തും ഒന്നും ഇല്ല എന്ന് സ്ഥിരമായി വിളിപ്പേര് കിട്ടാറുള്ള ചില ആളുകള്‍ക്ക് ഉപകാരമായി.. നെയ്യപ്പം തിന്നാല്‍ രണ്ടുണ്ട് കാര്യം എന്ന് പറയുന്നത്  പോലെ ഇതിപ്പോ ലീഗിനെ അടിക്കാനും തീവ്രവാദിയും ആക്കാന്‍ കിട്ടിയ അവസരവും ആയി അതോടൊപ്പം സ്വന്തം വ്യവസായത്തെ രക്ഷിചെടുക്കുകയും ചെയ്യാം.. 

മുകളില്‍ പറഞ്ഞ ആളുടെ പ്രസ്താവനക്ക് കൃത്യമായ ദുരുധ്യേശങ്ങള്‍ ഉണ്ടെന്നത് കൊണ്ട് ആ പ്രസ്താവന കണക്കിലെടുക്കേണ്ട എന്ന് വിചാരിച്ചു നില്‍ക്കുംബോയാണ് മന്ത്രി സഭയില്‍ നിന്ന് തന്നെ ഇതിനെതിരെ ശക്തമായ ഭാഷയില്‍ ഇതിനെ എതിര്‍ത്ത് കൊണ്ട് പ്രസ്താവന വന്നത്.. ഞാന്‍ കേരളത്തിലെ ഒരു മന്ത്രി ആണ് എന്നാ കാര്യമൊക്കെ മറന്നു അവര്‍ ലീഗിനെ മാത്രമല്ല ഹൈക്കോടതിയെ പോലും പരാമര്‍ശിച്ചു കളഞ്ഞു, ജനങ്ങള്‍ എന്ത് കുടിക്കണം എന്ന് തീരുമാനിക്കേണ്ടത് ഹൈക്കോടതി അല്ല എന്നാ പ്രസ്താവന എന്ത് സാഹചര്യത്തില്‍ നിന്നാണ് ഒരു ജനപ്രധിനിതിയില്‍ നിന്ന് വന്നത് എന്ന് മനസ്സിലാക്കണമെങ്കില്‍ ചിലപ്പോ ഈ വ്യവസായത്തില്‍ നിന്നും സ്വന്തം പോക്കെട്ടിലേക്ക് വരുന്ന ചുളയുടെ എണ്ണം കൂടി കണക്കിലെടുക്കേണ്ടി വന്നേക്കാം.. ഹേ മന്ത്രീ, താങ്കള്‍ ഈ പ്രസ്താവിച്ചത് പോലെ കേരളത്തിലെ ഓരോ ജനങ്ങള്‍ സര്‍ക്കാരിന്റെ ഓരോ നയങ്ങള്‍ ചോദ്യം ചെയ്‌താല്‍ താങ്കള്‍ അവര്‍ക്ക് വേണ്ടി നില കൊള്ളുമോ..?? കുറച്ചു മുന്നേ നിരോധിച്ച പാന്‍ മസാലയുടെ കാര്യത്തില്‍ ഞങ്ങള്‍ എന്ത് ചവക്കണം എന്ന് തീരുമാനിക്കേണ്ടത് സര്‍ക്കാര്‍ അല്ല എന്ന് ഒരു കൂട്ടര്‍ പറഞ്ഞാല്‍ നിങ്ങള്‍ ആ നിരോധനം ഒഴിവാക്കുമോ..? 

9/11 നാം കബളിക്കപ്പെട്ടോ..??

ഇന്ന് സെപ്റ്റംബര്‍ 11 പതിനൊന്നു വര്ഷം മുന്നേ അമേരിക്കന്‍ വാര്‍ത്താ എജെന്സികള്‍ വഴി ഞെട്ടിപ്പിക്കുന്ന ഒരു വാര്‍ത്ത പുറത്തു വന്ന ദിവസം... ലോകത്ത് ഒരു മത വിഭാഗത്തിന് നേരെ ശത്രുതയുടെയും സംശയത്തിന്റെയും മുനകള്‍ കൂടുതല്‍ ശക്തമായി എറിയാന്‍ തുടങ്ങിയ ദിവസം..   തീവ്രവാദികള്‍ അമേരിക്കന്‍ യാത്ര വിമാനം തട്ടിയെടുത്തു അമേരിക്കയിലെ പ്രധാനപ്പെട്ട കെട്ടിടങ്ങളില്‍ ഒന്നായ വേള്‍ഡ് ട്രേഡിംഗ്  സെന്റെറിന്റെ രണ്ടു കെട്ടിടങ്ങളിലേക്ക് ഇടിച്ചു കേറ്റി തകര്‍ത്തു... ഞെട്ടിത്തരിച്ചു പോയ വാര്‍ത്ത.. നാല് വിമാനങ്ങള്‍ അന്ന് തട്ടി എടുത്തു, അതില്‍ രണ്ടെണ്ണം  വേള്‍ഡ് ട്രേഡിംഗ് സെന്റെരിലെക്കും ഒരെണ്ണം പെണ്ടഗോനിലെക്കും ഇടിച്ചു കേറി... ഒരെണ്ണം തകര്‍ന്നു വീണു.. ആയിരങ്ങള്‍ അന്ന് കത്തിക്കരിഞ്ഞും കെട്ടിടത്തിന്റെ അവശിഷ്ടങ്ങളില്‍ പെട്ടും കെട്ടിടത്തില്‍ നിന്നും ചാടിയും മരണപ്പെട്ടു..  അന്ന് കൊല്ലപ്പെട്ട ആയിരക്കണക്കിന് നിരപരാധികള്‍ക്ക്‌ ആദരാഞ്ജലികള്‍.. 

 ശക്തമായ ഇന്റലിജന്‍സ് സൗകര്യം ഉള്ള ഒരു രാജ്യത്ത് ഒരു ദിവസം നാല് വിമാനങ്ങള്‍ വളരെ എളുപ്പത്തില്‍ തട്ടി എടുത്തു എന്നത് ഉള്‍ക്കൊള്ളാന്‍ അത്ര പെട്ടെന്ന് ആര്‍ക്കും കഴിഞ്ഞെന്നു വരില്ല.. എന്നാലും കെട്ടിടങ്ങളിലേക്ക് വിമാനം ഇടിച്ചു കേറുന്ന വീഡിയോയും മറ്റും കണ്ടപ്പോ അത് ശേരിയാനെന്നു വിശ്വസിക്കേണ്ടി വന്നു.. തീവ്രവാദികള്‍ക്ക് നേരെ ഇത്ര ശക്തമായ വടി കിട്ടിയത് അമേരിക്ക ശെരിക്കും മുതലെടുക്കുന്ന കാഴ്ചകളാണ് നമ്മള്‍ പിന്നെ കണ്ടത്.. അമേരിക്ക ആയുധം കൊടുത്തു വളര്‍ത്തി ഒരു കാലത്ത് സമാധാനത്തിനു വേണ്ടിയുള്ള ദൂതനെന്നു വാഴ്ത്തി നടന്ന ഉസാമ ബിന്‍ ലാദനാണ് ഇതിനു പിന്നിലെന്നും അയാള് ഒളിച്ചിരിക്കുന്നത് അഫ്ഗാനിസ്ഥാനില്‍ ആണെന്നും പറഞ്ഞു ആ രാജ്യത്തിന് നേരെ യുദ്ധം പ്രക്യാപിച്ചു..

 അഫ്ഗാനിസ്ഥാനിലേക്ക് സൈന്യത്തെ അയച്ചു ആ രാജ്യത്തിന്റെ നിയന്ത്രണം ശക്തമായ ആക്രമങ്ങള്‍ വഴി പിടിച്ചെടുക്കുന്നത് വരെ എത്തി ആ കാര്യങ്ങള്‍.. ആ കഥകളൊക്കെ നമുക്കെല്ലാവര്‍ക്കും അറിയാം.. അതിലേക്കു കൊടുത്താല്‍ കടക്കാന്‍ ഞാന്‍ ആഗ്രഹിക്കുന്നില്ല.. 

ഈ അടുത്ത കാലത്ത് യാദ്രിശ്ചികമായി ഈ വേള്‍ഡ് ട്രേഡിംഗ് തകര്‍ച്ചക്ക് പിന്നില്‍ അമേരിക്ക തന്നെയോ എന്നാ വീഡിയോ കാണാന്‍ ഇടയായി.. അതില്‍ പറഞ്ഞ കാര്യങ്ങള്‍ വെച്ച് ഇതിനെ പറ്റി കൂടുതല്‍ അന്വേഷിക്കാന്‍ തീരുമാനിച്ചു.. അങ്ങനെ കിട്ടിയ കുറച്ചു നിഗമനങ്ങള്‍ നിങ്ങളുമായി പങ്കു വെക്കാന്‍ ആഗ്രഹിക്കുകയാണ്.. 

പ്രധാനെപ്പെട്ട ഒരു സംശയം അഞ്ഞൂറ്  മീറ്ററിന് മുകളില്‍ ഉയരമുള്ള കെട്ടിടത്തിന്റെ മുകള്‍ ഭാഗത്ത് ഒരു വിമാനം ഇടിച്ചതിനു ഒരു മണിക്കൂറിനുള്ളില്‍ ആ കെട്ടിടം പൂര്‍ണമായും തകര്‍ന്നു തരിപ്പണമായി എന്നതാണ്.. അതും അടുത്തുള്ള കെട്ടിടങ്ങള്‍ക്ക് മുകളിലേക്ക് വീഴാതെ നേരെ ഭൂമിയിലേക്ക്‌ താഴ്ന്നു എന്നതാണ്.. കെട്ടിടങ്ങള്‍ പൊളിക്കാന്‍ ഉപയോഗിക്കുന്ന ഒരു വിദ്യ ഉണ്ട്, എല്ലാ നിലയിലും സ്ഫോടക വസ്തു സ്ഥാപിച്ച ശേഷം ഒരേ സമയം പൊട്ടിച്ചാല്‍ വശങ്ങളിലേക്ക് വീഴാതെ നേരെ താഴേക്ക്‌ മാത്രം വീഴ്ത്തുന്ന വിദ്യ.. അങ്ങനെ ഒരു വിദ്യ ഇതില്‍ ഉപയോഗപ്പെടുതിയോ എന്നാ സംശയം ബലപ്പെടുത്തുന്ന ചിലത് കാണാന്‍ ഇടയായി.. 

വിമാനം ഇടിച്ച ഭാഗം മാത്രം കത്തി കൊണ്ടിരിക്കുമ്പോ പെട്ടെന്ന് എല്ലാ നിലയിലും സ്ഫോടനം ഉണ്ടാവുകയും നിമിഷങ്ങള്‍ക്കകം കെട്ടിടം പൂര്‍ണമായും തകരുകയായിരുന്നു എന്നും താഴെയുള്ള വീഡിയോ ശ്രദ്ധിച്ചാല്‍ മനസ്സിലാവും..

അത് പോലെ ഉയര്‍ന്നു വന്ന ഒരു സംശയമാണ് വിമാനമാണോ അതോ മിസ്സൈല്‍ ആണോ കെട്ടിടത്തില്‍ ഇടിച്ചു കയറിയത് എന്നത്.. അതിനുള്ള പ്രധാന കാരണങ്ങളില്‍ ഒന്ന് കെട്ടിടത്തില്‍ ഇടിച്ച വിമാനം അതെ വേഗതയില്‍ തന്നെ എതിര്‍ വശത്ത് എത്തി എന്നതാണ്.. മുന്നിലുള്ള കെട്ടിടത്തിന്റെ സ്റ്റീല്‍ ഫ്രേമുകളില്‍ തട്ടിയിട്ടും വേഗതക്ക് ഒരു കുറവും വന്നില്ല എന്നത് സംശയം ഉളവാക്കുന്നു.. താഴെയുള്ള വീഡിയോ ശ്രദ്ധിച്ചാല്‍ കാണാന്‍ പറ്റും.. മാത്രമല്ല മറുവശത്ത് എത്തിയ വിമാനത്തിന്റെ മുന്‍ വശത്തിന്  ഒന്നും സംഭവിച്ചിട്ടില്ല എന്ന്.. ഒരു മിസ്സിലിനു മാത്രമേ ഇത്ര ശക്തമായ ബില്ടിങ്ങില്‍ ഇടിച്ചിട്ടും തകരാതെ അപ്പുറത്ത് എത്താന്‍ കഴിയു എന്നാണു ഞാന്‍ മനസ്സിലാക്കുന്നത്.. 

ഇങ്ങനെ എല്ലാ വിധത്തിലും സംശയം ഉളവാക്കുന്ന ഒരുപാട് കാര്യങ്ങള്‍ ഇതുമായി ബന്ധപ്പെട്ടു ദുരൂഹമായി നില്‍ക്കുന്നു എന്നതാണ് വസ്തുത.. എണ്ണ ഉത്പാദന രാജ്യങ്ങളിലേക്ക് കടന്നു കയറാന്‍ വേണ്ടി നടത്തിയ ഒരു നാടകമാണ് എന്ന് വിശ്വസിക്കുന്നവര്‍ പറയുന്ന കാര്യങ്ങള്‍ തള്ളാന്‍ പറ്റുന്നതല്ല.. ഇതുമായി ബന്ധപ്പെട്ടുള്ള കുറച്ചു വീഡിയോ ലിങ്കുകള്‍ താഴെ ഇടുന്നു.. അവസാനമായി, വിമാനം തട്ടിയെടുത്തു എന്ന് പറയപ്പെടുന്ന 19 പേരില്‍ 7 പേര് ഇപ്പോയും ജീവിച്ചിരിക്കുന്നു എന്നതാണ്..!!!  

http://whatreallyhappened.com/WRHARTICLES/hijackers.html

http://rense.com/general69/911ms.htm

http://whatreallyhappened.com/WRHARTICLES/hoax.html

ഭാര്യക്കും കിട്ടണം ശമ്പളം..!!!

ജീവിതത്തിന്റെ രണ്ടറ്റം കൂട്ടി മുട്ടിക്കാന്‍ കഷ്ട്ടപെടുന്ന ഗൃഹനാഥന്മാര്‍ക്ക്  ഇതാ അടുക്കളയുടെ ചൂടറിയാത്ത ചില്ലു ഗ്ലാസിട്ട ഓഫീസില്‍ ഇരുന്നു നാട്ടിലെ സ്ത്രീകളുടെ മൊത്തം പ്രശ്നങ്ങള്‍ പഠിച്ചു പരിഹാരം കാണാന്‍ നടക്കുന്ന കൊച്ചമ്മമാരുടെ കിടിലന്‍ സമ്മാനം..!!! സ്വന്തം ഭാര്യക്കും മാസാ മാസം എണ്ണി കൊടുക്കണം പോലും...!!! വെറുതെയല്ല, ഭാര്യ ചെയ്യുന്ന വീട്ടു ജോലികള്‍ക്കും ഭക്ഷണ സാദനങ്ങള്‍ ഉണ്ടാക്കി വിളമ്പി തന്നു സ്നേഹിക്കുന്നതിനും മാസത്തില്‍ കൃത്യമായി ശമ്പളം കൊടുക്കണം എന്ന്..!!! (ഇതൊക്കെ പെണ്ണ് കേട്ടുന്നതിന്റെ മുന്നേ അറിഞ്ഞിരുന്നെങ്കില്‍ ഒന്ന് കൂടെ ആലോചിച്ച ശേഷം മതിയായിരുന്നു കല്യാണം എന്ന് ആത്മഗദം..!!) 

ഇത്രയും കാലം കൊച്ചമ്മമാരുടെ സ്ഥിരം ഡയലോഗ് ആയിരുന്നു സ്ത്രീകളെ കേവലം വീട്ടു ജോലിക്കാരി ആക്കി മാറ്റുന്നു, ഞങ്ങള്‍ക്ക് അതില്‍ നിന്നും മോചനം വേണം എന്നൊക്കെ... ഈ കൊച്ചമ്മമാരെ മാറ്റി നിര്‍ത്തിയാല്‍ ഏതൊരു സ്ത്രീയും അഭിമാനത്തോടെ പറയും, ഞങ്ങള്‍ മക്കള്‍ക്കും ഭര്‍ത്താവിനും രക്ഷിതാക്കള്‍ക്കും ഭക്ഷണം ഉണ്ടാക്കി കൊടുക്കുന്നത് അല്ലെങ്കില്‍ അവരെ ശുശ്രൂഷിക്കുന്നത് ഞങ്ങളുടെ മനസ്സിന്റെ സന്തോഷത്തിനാണ്.. ഞങ്ങള്‍ ഉണ്ടാക്കി കൊടുത്ത ഭക്ഷണം വീട്ടുകാര് കഴിക്കുന്നത് കണ്ടു ഞങ്ങളുടെ മനസ്സ് നിറയുന്നു... ഇങ്ങനെയുള്ള സ്ത്രീകളെ മുകളില്‍ ഉദ്ധരിച്ച ഡയലോഗ് പറഞ്ഞു പറഞ്ഞു വശീകരിക്കാന്‍ കൊച്ചമ്മമാര്  സകല ശ്രമങ്ങളും നടത്തി നോക്കി, ആണുങ്ങളെ ഒന്ന് അടുക്കളയില്‍ കേറ്റാന്‍...!!! രക്ഷയില്ല എന്ന് തോന്നിയപ്പോ ഇനി എന്ത് ചെയ്യും എന്ന് ആലോചിച്ചു തലച്ചോറ്(?) പുണ്ണാക്കി ഇരിക്കുംപോയാണ് പുതിയ ഒരു ഐഡിയ, പണിയെടുക്കാം പക്ഷെ മാസത്തില്‍ കൃത്യമായി ശമ്പളം കിട്ടണം..!!!  ഒരു ദിവസം പോലും സ്വന്തം വീട്ടുകാര്‍ക്ക് തന്റെ കൈ കൊണ്ട് എന്തെങ്കിലും ഉണ്ടാക്കി കൊടുത്തു അവര്‍ ഭക്ഷിക്കുന്നത് കണ്ടു സന്തോഷിക്കാന്‍ പോലും മുതിരാത്ത കൊച്ചമ്മമാരെ, പണം എന്ന് കേട്ടാല്‍ സ്ത്രീകളുടെ മനസ്സ് മാറും എന്ന് വിചാരിച്ചാണ് നിങ്ങളുടെ ഈ പുതിയ അടവെങ്കില്‍, നിങ്ങള്‍ വിഡ്ഢികളുടെ സ്വര്‍ഗത്തില്‍ എന്നെ പറയാന്‍ പറ്റൂ..കാരണം വീട്ടു ജോലിക്ക് ആളുണ്ടെങ്കില്‍ പോലും വീട്ടുകാര്‍ക്കുള്ള ഭക്ഷണം സ്വന്തം കൈ കൊണ്ട് ഉണ്ടാക്കുന്ന  മഹതികളായ അമ്മമാരും ഭാര്യമാരുമാണ് ഈ നാടിന്റെ മുതല്‍ കൂട്ട്.. വീട്ടുകാരുടെ സ്നേഹതെക്കാലും വലിയ ഒരു സന്തോഷവും മാസം കിട്ടാന്‍ പോകുന്ന ഈ ശമ്പളത്തില്‍ നിന്നും ലഭിക്കില്ല എന്ന് മാത്രമല്ല, അത് കുടുംബം എന്നാ സങ്കല്‍പ്പത്തെ അല്ലെങ്കില്‍ മഹത്വരമായ ഘടനയെ അട്ടി മറിക്കാന്‍ മാത്രമേ ഉപകാരപ്പെടു...

വാല്‍ കഷ്ണം:വീട്ടിലെ തീന്‍ മേശയില്‍ നിന്നും ഭക്ഷണത്തിന് ശേഷം എണീറ്റ്‌ പോകുമ്പോള്‍ ഭാര്യമാര്‍ക്കുള്ള ടിപ് വെക്കാന്‍ മറക്കണ്ട...!!! ഇനിയിപ്പോ വീട്ടിലെ ജോലികള്‍ മൊത്തം എടുക്കാന്‍ ആളുണ്ട്, അത് കൊണ്ട് ഭാര്യക്ക് പ്രത്യേകം ശമ്പളം കൊടുക്കണ്ട എന്നാണു മനസ്സില്‍ എങ്കില്‍ സൂക്ഷിക്കുക, ഭാര്യക്ക് നോക്ക് കൂലി കൊടുത്തില്ലെങ്കില്‍ പട്ടിണിയാവാന്‍ സാധ്യത ഉണ്ട്, ജാഗ്രതൈ..!!! 

എയര്‍ ഇന്ത്യയുടെ മായാജാലം...

എയര്‍ ഇന്ത്യയുടെ മായാജാലം...

അങ്ങനെ എയര്‍ ഇന്ത്യയുടെ ലാഭ- നഷ്ടക്കണക്കുകള്‍ (നഷ്ടക്കണക്കുകള്‍ എന്ന് തിരുത്തി വായിക്കാന്‍ അപേക്ഷ) വീണ്ടും പുറത്തു വിട്ടു... നഷ്ട്ടം കേവലം 1705 കോടി മാത്രം..!!! അന്തര്‍ദേശീയ സര്‍വീസ് രംഗത്താണ് 2009, 2010, 2011 വര്‍ഷങ്ങളില്‍ ഇത്രയും കനത്ത നഷ്ടം വന്നത്... ഇതൊക്കെ പോരാത്തതിന് എയര്‍ ഇന്ത്യയുടെ സ്വന്തം പൈലടുമാര് അവരുടെ വകയായി രണ്ടു മാസത്തെ സമരം വഴി( ഗള്‍ഫ്‌ സെക്ടറിലെ ഏറ്റവും കൂടുതല്‍ ആളുകള്‍ യാത്ര ചെയ്യുന്ന സമയത്ത് മറ്റു എയര്‍ കമ്പനികളുമായി ഒത്തു കളിച്ചു കൊണ്ട് രണ്ടു പേരുടെയും കീശ വീര്‍പ്പിക്കാനുള്ള കലാപരിപാടി ആയിരുന്നു ആ സമരം..??? ) ഉണ്ടാക്കിയ നഷ്ട്ടം 600 കോടിയും...!!! 

എപ്പോ നോക്കിയാലും സീറ്റ്‌ ഇല്ല എന്നോ അല്ലെങ്കില്‍ വലിയ റേറ്റ് കാണുന്ന എയര്‍ ഇന്ത്യ എങ്ങനെ ഇത്രയും നഷ്ട്ടതിലായി എന്ന് അല്ഭുതപ്പെട്ടാണ് നഷ്ട്ടക്കണക്കുകളുടെ വിശദ വിവരങ്ങള്‍ അന്വേഷിച്ചത്, അപ്പോഴാണ്‌ പിടിപ്പു കേടിന്റെ ഉള്ളു കള്ളികള്‍ പുറത്തു വരുന്നത്..

പ്രധാനപ്പെട്ട സെക്ടരുകലാണ് അമേരിക്ക, കാനഡ, യുറോപ്, ഗള്‍ഫ്‌ എന്നിവ... വിവിധ സെക്ടരുകളുടെ കണക്ക് നോക്കുകയാണെങ്കില്‍,  2009-10, 2010-11, 2011-12 സാമ്പത്തിക വര്‍ഷങ്ങളില്‍ യു.എസ്, യൂറോപ് സെക്ടറുകളില്‍നിന്ന് യഥാക്രമം 1078 കോടി, 1707 കോടി, 596.9 കോടി എന്നിങ്ങനെയാണ് വരുമാനം. എന്നാല്‍, ചെലവ് യഥാക്രമം 2057 കോടി, 2861 കോടി, 983 കോടി എന്നിങ്ങനെയാണ്. അതായത് ഈ സെക്ടറുകളില്‍ ഓരോ വര്‍ഷവും 979 കോടി, 1154 കോടി, 386.1 കോടി എന്ന ക്രമത്തില്‍ നഷ്ടം സംഭവിച്ചു.. അതായത് മൂന്നു വര്‍ഷത്തെ മൊത്തം നഷ്ട്ടം 1705 കോടിയും അമേരിക്ക, കാനഡ, യുറോപ് സെക്ടോരുകളില്‍ നിന്ന് മാത്രം 2519 കോടിയും..!!!  അതായത് അമേരിക്ക, കാനഡ, യുറോപ് സെക്ടരുകളില്‍ ചിലവഴിക്കുന്നതിന്റെ പകുതിയോളം നഷ്ട്ടമായി മാറുന്നു..!!!  

 യു എസ്, യുറോപ് സെക്ടരുകളില്‍ നിന്ന് മാത്രം 2519 കോടി നഷ്ട്ടം ഉള്ളപ്പോ  മൊത്തം നഷ്ട്ടം 1705 കോടി മാത്രമായതെങ്ങനെ എന്നാ ചോദ്യമാണ് പിന്നെ വരുന്നത്...അവിടെയാണ് എയര്‍ ഇന്ത്യയുടെ മായാജാലം..!!!  ഗള്‍ഫ്‌ സെക്ടറിലെ കണക്കു ചേര്‍ത്ത് വായിക്കുമ്പോള്‍ ആണ് ഈ നഷ്ട്ടം കുറയുന്നത്, അതായത് ഗള്‍ഫ്‌ സെക്ടറിലെ യാത്രക്കാരില്‍ നിന്നും പിഴിഞ്ഞെടുക്കുന്ന പണം മറ്റു സെക്ടറില്‍ നിന്നും ഉണ്ടാകുന്ന നഷ്ട്ടത്തിന്റെ അളവ് കുറയ്ക്കാനാണ് പോകുന്നത് എന്ന്..!!! സാധാരണ നല്ല ലാഭം തരുന്ന ഉപഭോക്താക്കളോട് ഉടമകള്‍ പുലര്‍ത്തുന്ന ഒരു നയം ഉണ്ട്, അവര്‍ക്ക് കൂടുതല്‍ സൗകര്യം ചെയ്തു കൊടുത്തു അവരെ സന്തോഷിപ്പിച്ചു പിടിച്ചു നിര്‍ത്തുക എന്ന്... എവിടെ..!!! 4-5 മണിക്കൂര്‍ മാത്രം യാത്ര  ദൈര്‍ഘ്യം ഉള്ള  ഗള്‍ഫ്‌ സെക്ടരുകളിലെ ടിക്കറ്റ്‌  നിരക്കും  പത്തു മണിക്കൂറിനു മുകളില്‍  യാത്ര  ദൈര്‍ഘ്യം ഉള്ള മറ്റു സെക്ടരുകളിലെ നിരക്കും വെച്ച് നോക്കുമ്പോള്‍ അറിയാം എത്ര മാത്രം 'സൌകര്യങ്ങള്‍' ചെയ്തു കൊണ്ടാണ് അവരെ 'പിടിച്ചു' നിര്‍ത്തുന്നത്(നാട്ടിലുള്ളവരെ അവിടെ തന്നെയും ഗള്‍ഫിലുള്ളവരെ അവിടെ തന്നെയും..!! ) എന്ന്..!!! ഗള്‍ഫ്‌ സെക്ടറുകള്‍ ഒഴിച്ച് മറ്റു സെക്ടരുകളില്‍ ഇത് വരെ കാര്യമായ യാത്ര പ്രശ്നങ്ങള്‍ കേട്ടിട്ടില്ല, ഇത് വരെ ആ ഭാഗതോട്ടു യാത്ര ചെയ്യാത്തത് കൊണ്ട് അതിന്റെ വിവരങ്ങളും അറിയില്ല.. എന്തായാലും നഷ്ട്ടക്കനക്ക് വെച്ച് നോക്കുമ്പോ വിമാനങ്ങള്‍ ആളില്ലാതെ ഓടുന്നു അല്ലെങ്കില്‍ കുറഞ്ഞ നിരക്കില്‍ ഓടുന്നു എന്ന് മനസ്സിലാക്കാം.. അമേരിക്കന്‍ സെക്ടറിലെ സീസണും ഗള്‍ഫ്‌ സെക്ടറിലെ സീസണും ഒരുമിച്ചല്ല എന്നിരിക്കെ എന്ത് കൊണ്ട് ലാഭം തരുന്ന ഗള്‍ഫ്‌ സെക്ടറിലെ സീസണ്‍ സമയത്ത് കുറച്ചു വിമാനങ്ങള്‍ അധികം ഇട്ടു കൊണ്ട് യാത്രക്കാര്‍ക്ക് സൌകര്യവും എയര്‍ ഇന്ത്യയുടെ ലാഭവും കൂട്ടുന്നില്ല..?? എയര്‍ ഇന്ത്യയുടെ ഈ അനാസ്ഥ മുതലെടുത്ത്‌ കൊണ്ട് ഏറ്റവും കൂടുതല്‍ മെച്ചം ഉണ്ടാക്കുന്നത് വിദേശ വിമാന കമ്പനികളാണ്.. നമ്മുടെ രാജ്യത്ത് എത്തേണ്ട വന്‍ തുകയാണ് എയര്‍ ഇന്ത്യയുടെ ഈ കെടുകാര്യസ്ഥത കൊണ്ട് നഷ്ട്ടമാകുന്നത് എന്നതോടൊപ്പം സ്വന്തം പൌരന്മാര്‍ക്ക് സാമ്പത്തികമായും മാനസികമായും വന്‍ ബുധിമുട്ടുകലുമാണ് എന്നതും കൂടി ചേര്‍ത്ത് വായിക്കുക...  

വാല്‍കഷ്ണം :എന്റെ ചേട്ടാ, ലക്ഷം കോടികളുടെ അഴിമതിയും നഷ്ട്ടക്കണക്കുകളും പുറത്തു വന്നോണ്ടിരിക്കുംബോയ എയര്‍ ഇന്ത്യയുടെ ഒരു 1700കോടിയുടെ കണക്കും കൊണ്ട് വന്നിരിക്കുന്നെ , ഒന്ന് പോടപ്പാ...!!!! അവരൊക്കെ ഇത്രേം ചെയ്യുമ്പോ ഞങ്ങള്‍ ആയിരത്തിന്റെ കണക്കെങ്കിലും പറയണ്ടേ, അല്ലെങ്കില്‍ ലക്ഷക്കണക്കിന്‌ രൂപ മാസാ മാസം എണ്ണി വാങ്ങി എയര്‍ ഇന്ത്യയുടെ തലപ്പത്തിരിക്കുന്ന ഞങ്ങള്‍ക്ക് മോശമല്ലേ..!!!